SIKLISTA NAGULUNGAN NG TRACTOR HEAD

PATAY ang isang siklista matapos mabangga at magulungan ng isang tractor head sa Caloocan City, kamakalawa ng gabi.

Dead on the spot ang biktimang kinilalang si Dexter Cabug-Os, 41 anyos, pintor, at residente sa Malaya St., Brgy. 28, ng lungsod, sanhi ng pinsala sa ulo at katawan.

Nakapiit ngayon habang nahaharap sa kaukulang kaso ang driver ng Mitsubishi Tractor Head, may plakang NGA 3241, kinilala bilang si Jeffrey Bombales, 34 anyos ng Bacoor Cavite.

Sa nakarating na report kay Caloocan police chief Col. Samuel Mina, Jr., dakong 8:48 pm, binabagtas ng biktima sakay ng kanyang bisikleta ang Dagat-Dagatan Avenue ngunit pagsapit sa kanto ng Lapu-Lapu Avenue, Brgy. 8, ay nabangga ng sasakyan na minaneho ni Bombales ang likurang bahagi ng biktima.

Nang bumagsak ang biktima, nagulunga ng kanang gulong ng tractor head na nagresulta ng kanyang agarang kamatayan. Sumuko si Bombales sa pulisya.