Sa Boracay
2 TURISTA NATAGPUANG PATAY SA HOTEL

WALANG BUHAY nang matagpuan ang dalawang turista, kabilang ang isang Australian national, sa loob ng kanilang silid sa isang hotel sa isla ng Boracay, sa Malay, Aklan nitong Lunes, 21 Marso.

Kinilala ang mga turistang sina Dennis Yu, 44 anyos, isang Filipino ayon sa kaniyang ID card; at Maria Cecilia Jellicode, isang Australian national ayon sa kaniyang pasaporte.

Sa inisyal na imbestigasyon ng Malay MPS, nakitaan ng mga pinsala sa katawan ang dalawa na indikasyong hindi natural ang kanilang kamatayan.

Pahayag ni P/Lt. Col. Don Dicksie De Dios, hepe ng Malay police, hinihintay pa nila ang resulta ng awtopsiya upang matukoy ang dahilan ng kamatayan ng dalawa.

Wala rin umanongn palatandaan na mayroong ibang taong pumasok sa kanilang silid base sa kuha ng mga security camera at mga security record.

Walang nawawala sa kanilang mga personal na gamit gaya ng pera, alahas, laptop, at mga cellphones.

Natagpuan ang halos magkatabing katawan ng dalawang turista sa sahig ng silid sa Brgy. Balabag bandang tanghali kamakalawa nang tingnan ng isang hotel staff dahil nakatakda na silang mag-check out.

Dumating ang dalawang turista sa isla noong 13 Marso at nakatakdang mag-check out noong Lunes mula sa kanilang accommodation extention.