HATAW! D'yaryo ng Bayan hatawtabloid.com
DAHIL sa bigat ng dinanas, tinapos ng isang dalagita ang kanyang sariling buhay sa pamamagitan ng pagbibigti sa sarili matapos silang maghiwalay ng kanyang boyfriend sa Malabon City.
Ayon kay Malabon City police chief, P/Col. Albert Baro, nadiskubre ang katawan ng biktima na itinago sa pangalang Ashley ng kanyang pinsan na nakabigti sa loob ng kuwarto ng kanilang bahay sa Sitio 6 Dumpsite, Brgy. Catmon dakong 8:30 am gamit ang isang lubid na nakapulupot sa kanyang leeg, habang ang dulo ay nakatali sa biga ng kisame.
Sa pinagsamang ulat nina P/SSgt. Jeric Tindugan at P/SSgt. Michael Oben, dumanas ng depresyon ang dalagita matapos silang mag-break ng kanyang boyfriend, isang linggo na ang nakalipas.
Huling nakitang buhay ang biktima dakong 8:00 am nang magtungo ang kanyang ina sa trabaho sa kalapit na computer shop.
Makalipas ang ilang sandali, inutusan ng ina ng biktima ang kanyang pamangkin na tawagin ang kanyang anak sa kanilang bahay kung saan ito nadiskubreng nakabigti.
Mabilis na isinugod ng ina ang biktima sa San Lorenzo Ruiz General Hospital ngunit hindi na umabot nang buhay.
(ROMMEL SALES)
