HATAW! D'yaryo ng Bayan hatawtabloid.com
INIHAYAG ni Mayor Rex Gatchalian, nabigyan na ng kanilang unang dose ng CoronaVac kontra CoVid-19 ang nasa 73 matatandang inabandona ng kanilang mga pamilya sa lansangan ng lungsod.
“Remember the 73 senior citizens who were abandoned by their families and now live in ‘Bahay Kalinga,’ it’s their turn to be vaccinated,” ani Mayor Rex.
Ayon kay Public Information Officer Zyan Caiña, karamihan sa matatanda ay iniligtas ng pamahalaang lungsod matapos silang abandonahin ng kanilang mga pamilya sa lansangan, ilang buwan na ang nakalilipas.
Ang napabayaang senior citizens ay pansamantalang nakatira sa Bahay Kalinga na pinondohan ng lungsod na matatagpuan sa Barangay Canumay West, ang kalahati ay para sa mga kabataan na nangangailangan ng special protection (CNSP) o sa mga inaabuso at napabayaang bata.
Ang pamahalaang lungsod ay nag-set-up ng pansamantalang dormitoryo sa loob ng Bahay Kalinga upang matulungan ang mga inabandonang senior citizens habang itinatayo ang isang permanenteng estruktura na eksklusibo para sa kanila.
Tiniyak ni Gatchalian, ang mga inabandonang matatanda ay bibigyan ng bakuna kontra CoVid-19 bago mailipat sa kanilang mga bagong tahanan, ang Bahay Kanlungan, na matatagpuan din sa naturang lugar.
“It’s the best way to protect them and the entire community as well,” ayon sa alkalde ng Valenzuela na nagsabing ang kanilang bagong tirahan ay matatagpuan sa propriedad ng kanyang ama na si William Gatchalian, nagbigay nito sa lokal na pamahalaan para sa nasabing layunin.
Ang Bahay Kalinga ay itinatag noong panahon ni Mayor at ngayon ay Senador Sherwin “Win” Gatchalian na tumupad sa kanyang pangakong magtayo ng ganoong estruktura upang magsilbing pansamantalang kanlungan ng mga street wanderers, foundling children at mga nakarekober mula sa pang-aabuso.
(ROMMEL SALES)
