Karnap na sasakyan na-track ng GPS

TINUTUGIS ngayon ng mga tauhan ng Manila Police District (MPD) ang apat na carnapper na nag-abandona sa isang sasakyan na kanilang sapilitang tinangay mula sa may-ari nito sa SM San Lazaro.

Ayon sa ulat, ang naturang sasakyan na kulay puting Nissan Terra may conduction sticker na F1 J857  ay natagpuang inabandona sa Daang Bakal ng Barangay 152 sa Tondo, Maynila.

Sa report, nagsasagawa ang MPD-PS7 ng Anti-Criminality Checkpoint sa kahaban ng Yuseco St., malapit sa kanto ng Dagupan St., Tondo, nang ialarma sa kanila ang naturang sasakyan na umano’y walang habas na pumasok sa Daang Bakal ng Yuseco.

Agad itong pinuntahan ng mga operatiba kung saan nalaman na inabandona ito sa naturang lugar.

Dumating ang Task Force Limbas sa pangunguna ni P/Lt Col. Joel Manuel Ana nang ma-track ang sasakyan sa pamamagitan ng GPS mula sa may-ari nito.

Una rito, napag-alaman na nasa SM San Lazaro ang may-ari at driver ng sasakyan na kapwa nasugatan nang sapilitang agawin ng apat na ‘di kilalang carnapper saka dinala sila sa San Fernando, Angeles City, Pampanga at doon ibinaba at tinangay ang naturang sasakyan.

Dinala sa tanggapan ng Highway Patrol group (HPG) sa Camp Crame, Quezon City ang naturang carnapped vehicle ng Task Force Limbas para sa kaukulang imbestigasyon at disposisyon.