HATAW! D'yaryo ng Bayan hatawtabloid.com
BINAWIAN ng buhay ang anim katao, kabilang ang apat na garbage collector, habang sugatan ang apat na iba sa banggaang kinasasangkutan ng tatlong truck sa kahabaan ng Marcos Highway sa bahagi ng Sitio Bontiway, Barangay Poblacion, sa bayan Tuba, lalawigan ng Benguet, dakong 4:00 am kahapon, Lunes, 8 Hunyo.
Ayon kay Benguet Provincial Police Office (PPO) director Col. Elmer Ragay, bumangga ang isang truck ng basura ng Baguio City na minamaneho ni Mark Collantes, sa likuran ng isang dump truck na minamaneho ni Merson Manalastas habang binabagtas ang pababang bahagi ng highway.
Dahil sa lakas ng pagbangga, sumalpok ang dump truck sa unahang bahagi ng isang trailer truck na nasa kabilang direksiyon patungo sa lungsod ng Baguio.
Samantala, patuloy na umandar ang garbage truck hanggang bumangga sa isang concrete barrier sa kalsada saka tumagilid.
Kinilala ni Ragay ang mga namatay sa insidente na sina Mark Collantes, ang driver ng garbage truck; mga kolektor ng basura na sina Belly Joe Lachica, Raymart Lachica, John Rex Hilario, Rustom Lachica Dela Rama; at Jonathan Vargas, driver ng trailer truck mula sa bayan ng Aringay, sa lalawigan ng La Union.
Dinala sa Baguio General Hospital and Medical Center ang iba pang mga sugatang pasahero ng garbage truck na sina Roneo Collantes, Ernesto Collantes, Philip Dela Rosa, at isang kinilalang si Manalastas.
