DFA staff na ‘umayos’ sa diplomatic passport ni ex-Sec. del Rosario tiyak na ‘sabit’ — Sotto

NANINIWALA si Senate Pre­sident Vicente Tito Sotto III na may sasabit na tauhan ng Department of Foreign Affairs sa revalidation ng diplomatic pass­port ni dating secretary Albert Del Rosario.

Ipinaliwanag ni Sotto na malinaw sa Republic Act 8239 o Philippine Passport Act na ta­nging dating Pangulo at Panga­lawang Pangulo lamang ang maaaring i-revalidate ang diplo­matic passport at wala ng iba pang dating opisyal ng gobyerno.

Binigyang-diin ni Sotto, nakasaad sa naturang batas na walang bisa ang diplomatic pass­port kapag ang isang tao na gumagamit nito ay dating kalihim at dating halal ng bayan.

Inihalimbawa ni Sotto, kahit silang mga kasalukuyang sena­dor hindi gumagamit ng diplo­matic passport hangga’t hindi kasama ang pangulo sa pagbisita sa isang bansa.

Pinayohan ni Sotto si Del Rosario na pag-isipan munang mabuti bago maghain ng protesta laban sa Hong Kong na gagamitin pa ang DFA ukol sa validity ng diplomatic passport ng dating kalihim.

Magugunitang pinabalik ng bansa si dating DFA secretary Del Rosario matapos harangin sa paliparan ng Hong Kong dahil invalid na ang diplomatic passport ng dating kalihim.

Giit ni Sotto, ginagawa rin natin ito sa ating paliparan na nagpapabalik ng mga dayuhang intsik na kahinahinala ang pasa­porte at iba pang dokumento.

(CYNTHIA MARTIN)