Apela ng consumer groups: P8 PASAHE IBALIK (Presyo ng bilihin ibaba)

NANAWAGAN ang ilang grupo na ibaba ang pasahe at presyo ng mga bilihin kasunod nang pagbaba ng presyo ng mga produktong petrolyo sa ikalimang sunod-sunod na ling­go. 

Naghain nitong Lunes ang United Filipino Con­su­mers and Commuters (UFCC) sa Land Tran­s-portation Franchising and Regulatory Board (LTFRB) ng petisyong ibalik sa P8 ang pasahe sa jeep dahil sa patuloy na pagbaba ng presyo ng langis sa pandaigdigang merkado.

“Nais po naming iba­lik sa P8… alam naman po natin na bumubuti na po ang kalagayan sa pandaigdigang pamilihan ng petrolyo,” ayon kay UFCC president RJ Ja­vel­lana nitong Martes.

Sa ilalim ng petisyon, ikinatuwiran ng grupo ang pagsuspende sa na­ka­takdang dagdag-bu­wis sa langis sa ilalim ng Tax Reform for Accele­ration and Inclusion (TRAIN) Law, at ang pahayag ng Transpor­tation department na huwag munang ituloy ang fare hike, bilang mga dahilan para sa bawas-pasahe.

Ayon kay Laban Konsyumer president Vic Dimagiba, dapat puwer­sahin ng Department of Trade and Industry (DTI) ang mga negosyante na bawasan ang presyo ng kanilang mga produkto kasunod ng rollback.

Batay sa kaniyang tantiya, nasa 10 hang­gang 13 porsiyento ang natitipid ng mga nego­s-yan­te sa delivery ng ka­nilang mga produkto nang magsimula ang mga bawas sa presyo ng la­ngis.

Sabay-sabay nagta­pyas ang mga kompanya ng langis ng presyo sa kanilang produktong pe­trolyo, katulad ng P2.30 kada litro sa gasolina, P2 kada litro sa diesel, at P1.85 kada litro sa kero­sene, nitong Martes.

Ito na ang pinaka­malaking halaga ng ba­was sa presyo ng pro­duk­tong petrolyo sa loob ng limang linggo.

Habang nagpatupad ang mga kompanyang Phoenix Petroleum at PetroGazz ng P2.50 kada litrong bawas sa presyo ng kanilang gasolina, at bawas na P2 kada litro sa diesel.

Ngunit kontra ang Federation of Jeepney Ope­rators and Drivers Association of the Philippines (FEJODAP) sa hirit ng tapyas-pasahe.

Paliwanag ni FEJODAP president Zeny Maranan, matagal na ang hirit nilang dagdag-pasa­he ngunit ngayon lang napagbigyan.

Dagdag niya, may mga tsuper pa ring hindi pa nakikinabang sa dag­dag-pasahe dahil hindi pa sila nakakukuha ng fare matrix.

Ngunit kung ibabalik aniya sa P39 per liter ang presyo ng krudo, doon na magiging bukas ang kani­yang hanay sa hirit na fare rollback.

Mula nitong Martes, naglalaro sa P7.70 hang­gang P7.80 ang halaga ng tinatapyas sa presyo ng gasolina, P5.05 kada litro hanggang P5.15 kada litro sa diesel, at P4.25 kada litro sa kerosene.

Sinabi ni LTFRB Board Member Aileen Lizada, prayoridad nila ang petisyon ng UFCC dahil 45 milyong com­muter ang apektado ng fare hike.

HATAW News Team