Mocha ayaw mag-sorry kay Kris (‘This is not about you’)

“THIS is not about you.”

Ito ang tugon ni Presidential Communications Assistant Secretary Margaux “Mocha” Uson sa pahayag ni Kris Aquino sa kanya nitong Martes, nang batikusin ng aktres ang post ng dating sexy dancer dahil sa umano’y “disrespect” sa yumao niyang mga magulang.

Sa 23-second video, idinepensa ni Uson ang kanyang desisyon na mag-post ng video na nagpapakita sa yumaong ama ng aktres, na si dating Senador Benigno “Ninoy” Aquino Jr., habang hinahalikan ng dalawang babae, kasunod ng kontrobersiyang bumabalot sa paghalik ni Pangulong Rodrigo Duterte sa isang married Filipina sa kanyang pagbisita sa South Korea.

Ang video habang hinahalikan ng dalawang babae si Aquino ay kuha bago siya paslangin sa Manila airport noong 21 Agosto 1983. Ayon sa aktres, dahil sa post ni Mocha ay nanumbalik ang sakit na kanyang naramdaman nang mawala ang kanyang ama.

Hindi nagpakita ng takot, iginiit ni Uson na si Kris ay “barking up the wrong tree.”

“This is not about Kris Aquino. Tungkol ito sa paglalagay ng malisya sa isang halik. Itinumbas lang sa gawain ng isang leader tulad ng tatay niya. Ms. Aquino, this is not about you,” pahayag ni Uson sa Facebook video.

Nauna rito, inihayag ni Special Assistant to the President Christopher “Bong” Go na pumayag si Uson na humingi ng paumanhin kay Kris. Gayonman, hindi ito ginawa ng dating sexy dancer.

        Sinabi ni Uson: “With all due respect to everyone involved, I decline to apologize for the truth.”

Sa 17-minute live video sa Facebook at Instagram nitong Martes ng gabi, sinabi ni Kris na handa siyang harapin si Uson “anytime, anywhere.”

“I am giving you fair warning, isa pa na bastusin o babuyin mo ang tatay o ang nanay ko, magtutuos tayo,” banta ng aktres.