HATAW! D'yaryo ng Bayan hatawtabloid.com
LAOAG CITY – Nalapnos ang leeg at likuran ng isang preso makaraan mabuhusan ng isang pulis ng mainit na tubig sa bayan ng Sarrat sa lalawigan ng Ilocos Norte kamakalawa.
Kinilala ang biktimang si Errol Fiesta, residente sa Brgy. 14 sa nasabing bayan, habang ang pulis na nakabuhos ng mainit na tubig sa kanya ay si PO2 Baris.
Ayon kay Chief Insp. Roldan Suitos, hepe ng PNP Sarrat, hinuli nila si Fiesta dahil sa pagwawala nang mala-sing.
Ngunit habang ipinapasok nila sa PNP station ay patuloy pa rin ang pagwawala kaya natabig niya si PO2 Baris na may hawak na tasa na may lamang mainit na tubig at nabuhusan ang leeg at likod ng biktima.
Samantala, iginiit ni Fiesta, natutulog siya nang mabuhusan ng mainit na tubig at hindi totoong nagwawala siya.
Tiniyak ng PNP na magsagawa sila nang mas malalim na imbestigasyon at kapag mapatunayang sinadya ang insidente ay mananagot si PO2 Baris.
