10-anyos nene patay sa sakal ng ‘rapist’ (Walang banyo dumumi sa tabi)

BACOLOD CITY – Natagpuang patay ang isang 10-anyos batang babae makaraan sakalin ng isang lala-king hinihinalang tangkang gumahasa sa kanya kamakalawa sa lungsod ng Cadiz, Negros Occidental.

Mismong ang ina ng biktima ang nakakita sa bangkay sa damuhan, 100 metro ang layo sa kanilang bahay bandang 1:45 pm.

Ito ay kasunod nang paghahanap makaraan ipabatid ng kambal ng biktima na nawawala bata simula dakong 8:00 am.

Ayon kay Supt. Jose Edel Manzano, hepe ng Cadiz City Police Station, agad nilang ipinasailalim sa post mortem examination ang bangkay ng biktima at napag-alaman na “asphyxia due to strangulation” o sakal ang ikinamatay ng bata.

Hinala ng pulisya, posibleng tinangkang gahasain ang bata ngunit lumaban kaya sinakal ng suspek.

Napag-alaman, dumumi ang bata sa lugar dahil wala silang sariling banyo.

Ayon kay Supt. Manzano , isolated o malayo sa ibang kabahayan ang tahanan ng biktima.

May nakuhang witness ang pulisya, nagsasabing may nakitang lalaki sa lugar na kinatagpuan sa bangkay pasado 11:00 am kahapon.

Ngunit tinuturing pa lamang itong ‘circumstantial’ at patuloy ang imbestigasyon sa krimen.