Bebot patay sa boypren na may ibang kasiping

DAVAO CITY – Pinatay sa sakal ng kanyang boyfriend ang isang babae na nakasaksi sa pagtatalik ng suspek at ng ibang kasintahan kamakalawa.

Kinilala ang biktimang si Jennifer Custodio Marbebe, 22, residente ng Block 30, Lot 16, Relocation, Brgy. Los Amigos, Tugbok District, Lungsod ng Davao.

Suspek sa krimen at nahaharap sa kasong murder ang nakatakas na si Alquin dela Peña, 22, nakatira sa Soliman, Tomas Monteverde, Sr., Agdao, Davao City.

Ayon kay Gershon Custodio Marbebe, nakatatandang kapatid ng biktima, halos magwala si Jennifer nang maaktohan ang pakikipagtalik ng kanyang boyfriend sa isang alyas Juliet na cashier din ang trabaho.

Sinuntok aniya ng suspek ang biktima sa tiyan at binalian pa ng kamay bago sinakal gamit ang kumot.

Nasaksihan ng 6-anyos anak ng biktima ang krimen nang sumilip sa butas ng kuwarto.

Patay na nang maisugod sa Robillo General Hospital ng Calinan, Davao City, ang biktima.

Inihahanda na ng Calinan-Philippine National Police ang kasong murder laban sa suspek, napag-alamang halos limang buwan pa lamang na karelasyon ng biktima.