Ate Guy, nagpabinyag na sa Dating Daan

MARAMI ang nagugulat sa mga aksiyon ni Nora Aunor nitong nakaraang araw.

Bigla siyang naging tagasunod at sabi ng sources ay nagpabinyag na sa grupong Dating Daan. Kung sa bagay maganda naman iyan dahil baka matulungan siya ng grupong relihiyosong iyan sa totoong pagbabago.

Tapos bigla siyang lumitaw sa isang misa roon sa libingan ni dating Pangulong Ferdinand Marcos. Kung ano ang dahilan at nakarating siya sa Libingan ng mga Bayani, siya lang ang nakaaalam.

Hindi iyan ang inaasahang “himala” ni Aunor. Ang matagal nang hinihintay ay iyong sinasabi niyang pagpapa-opera niya ng kanyang lalamunan sa doctor na umopera rin kay Julie Andrews noong araw para maibalik  ang kanyang boses. Ang dami ng tumulong sa kanya, nagbigay ng pera para maoperahan, pero hanggang ngayon hindi niya ginagawa iyon.

Siguro nga na-reliaze din niya na mas tama ang sinasabi ng mas maraming espesyalista na ano mang operasyon ang gawin sa kanya ay hindi na maibabalik pa ang kanyang boses. Isa pa, gustuhin man niya ngayon, siguro nga nagamit na niya ang pera para sana sa kanyang operasyon na hindi niya itinuloy.

May pelikula si Nora sa festival. Abangan natin iyan kung kikita. (ED DE LEON)