6 Vietnamese dinukot sa basilan

ZAMBOANGA CITY – Anim na Vietnamese nationals ang dinukot ng armadong kalalakihan habang sakay ng kanilang barko sa karagatan malapit sa Sibagu Island sa Lamitan City sa lalawigan ng Basilan.

Habang nakaligtas sa insidente ang isa pang sakay na Vietnamese bagama’t sugatan makaraan siyang barilin ng mga suspek nang tumakbo habang may iba pang nakapagtago.

Ayon sa Philippine Coast Guard (PCG), nangyari ang insidente dakong 7:00 am kahapon, kabilang sa anim na dinukot ang mismong kapitan ng MV Royale 16.

Sinabi ng sugatang biktima, 10 armadong kalalakihan ang umakyat sa naturang foreign vessel at puwersahang tinangay ang kanyang mga kasamahan.

Nabatid na nakatanggap ng tawag ang Coast Guard kahapon mula sa MV Lorcon IloIlo na may nakita silang isang crew na sugatan sakay ng foreign cargo vessel na agad nilang binigyan nang agarang lunas.

Hindi pa masabi ng mga awtoridad kung grupo ng teroristang Abu Sayyaf ang responsable sa insidente.