Dalagita hinalay sa himlayan

NAGA CITY- Swak sa kulungan ang isang lalaki makaraan maaktohan habang minomolestiya ang isang dalagita sa loob ng sementeryo sa bayan ng Talisay, Camarines Norte kamakalawa.

Kinilala ang suspek na si Raymundo Oberos, 47-anyos, isang pedicab driver.

Ayon sa ulat, naglalaro ang menor de edad at isa pang batang lalaki nang yayain sila ng suspek na sumakay sa kanyang padyak upang mamasyal sa lugar.

Ngunit imbes mamasyal,  dinala ng suspek ang dalawang bata sa sementeryo sa Brgy. Gabon sa naturang bayan at doon minolestiya ang dalagita.

Batay sa testigo, hinalikan at hinawakan ng suspek ang maseselang parte ng katawan ng biktima.

Upang hindi magsumbong sa mga awtoridad, binigyan ng sampung piso ng suspek ang kasamang batang lalaki ngunit nagpumiglas kaya tinakpan ang bibig at kinurot ang dalawang menor de edad.

Agad nadakip ang suspek makaraan sitahin ng mga nakakita sa insidente at dinala sa himpilan ng pulisya.

Nahaharap sa kasong act of lasciviousness in relation to RA 7610 ang suspek habang nakatakdang isailalim sa counselling ang mga biktima upang magbalik sa normal ang kanilang pamumuhay.