HATAW! D'yaryo ng Bayan hatawtabloid.com
BAGONG tren ang solusyon sa mabigat na trapiko mula Diliman, Quezon City hanggang Quiapo, Maynila.
Isang panibagong railway project mula Diliman hanggang Quiapo ang nais itayo ng isang Malaysian company, ayon kay Trade and Industry Secretary Ramon Lopez sa pulong balitaan sa Grand Hyatt Hotel sa Kuala Lumpur, Malaysia kahapon.
Sinabi ni Lopez, isang bilyong dolyar ang nilagdaan ng Malaysian company na East West Rail Transit Corporation katuwang ang A. Brown, local company ng Filipinas sa ilalim ng public-private partnership (PPP) project.
Ayon kay Lopez ang Department of Transportation ang mamahala sa naturang proyekto at daraan aniya sa normal na proseso ang proyekto para makita ang iba pang offer.
Una rito, sinabi ni Lopez, mas marami nang mamumuhunan ang nagpahayag ng interes na magnegosyo sa Filipinas dahil sa pangako ni Pangulong Rodrigo Duterte na wawalisin ang korupsiyon sa pamahalaan.
( ROSE NOVENARIO )
