3-anyos FilBrit twins patay sa sunog sa Cebu

CEBU CITY – Patay ang 3-anyos Filipino-British twins nang masunog ang kanilang dalawang palapag na bahay sa Acacia Place Subdivision, Salvador Extension Labangon, Cebu City, dakong 3:15 am kahapon.

Habang ligtas ang ina ng kambal na si June Myatt, 35, at ang kasambahay nilang si Lovelyn Espender, 18-anyos.

Ayon sa fire investigator na si SFO1 Rogelio Nabalos, natagpuang walang malay ang na-trap ang kambal sa second floor ng kanilang bahay.

Wala ring malay ang kasambahay nang matagpuan sa loob ng banyo habang sinasabing tumalon sa bintana ang ina ng kambal.

Agad binawian ng buhay ang paslit na si Philip Myatt habang dinala sa ospital ang kanyang kambal na si Elaine Margarret ngunit binawian ng buhay makalipas ang i-lang oras.

Base sa inisyal na imbestigasyon ng Bureau of Fire Protection, overheated centralized airconditioner ang dahilan ng sunog dahil palagi itong nakaandar 24/7.

Sinasabing nagsimula ang sunog sa sala ng bahay at mabilis na kumalat dahil malalaki ang kurtina.

Napag-alaman, suffocation ang dahilan ng pagkamatay ng kambal dahil hindi nasunog ang kanilang katawan.

Ang ama ng mga bata na isang negosyante ay kasalukuyang nasa England.