Paolo Ballesteros, enjoy sa paggawa ng Bakit Lahat ng Gwapo May Boyfriend?

IPINAHAYAG ni Paolo Ballesteros na enjoy siya sa kanilang pelikulang Bakit Lahat ng Gwapo May Boyfriend? na pinagbibidahan nila nina Anne Curtis at Dennis Trillo para sa Viva Films. Mula sa pamamahala ni Direk Jun Lana, showing na ngayon ang naturang pelikula.

Ayon kay Paolo, mami-miss niya ang naging bonding niya sa lahat ng nakasama sa  pelikulang ito.

“Very, very light lang kasi sa set, para lang kaming naglalaro sa camera. So I guess, iyon ang mami-miss naming lahat. Even ang mga crew, sila direk (Jun), ang gaan lang ng trabaho namin,” wika ng isa sa kuwelang casts ng Eat Bulaga.

Hinggil naman sa kissing scene niya rito sa kapwa lalaki, sinagot rin ni Paolo kung paano siya napapayag na gawin ang naturang eksena.

”Magaling si Direk Jun at saka smack lang naman iyon,” nakatawang esplika ni Paolo.

Idinagdag pa ni Paolo na masaya siya sa magandang feedback na natatanggap para sa kanilang pelikulang ito.

Actually, hindi lang si Paolo ang nagpahayag na enjoy siya sa project na ito. Maging si Dennis ay nagpasalamat sa opportunity dahil dream come true raw para sa kanya ang makasama sina Anne and Paolo sa isang pelikula. Para kay Anne naman, although bitin siya dahil sandali lang ang kanyang pakikipagtrabaho kina Pao at Dennis, sinabi niyang isang great experience raw ito.

Ibang kombinasyon ang makikita kina Anne, Dennis at Paolo sa Bakit Lahat ng Gwapo May Boyfriend?, kaya hindi dapat palagpasin ang pelikulang ito.

ALAM MO NA! – Nonie V. Nicasio