UMALMA ang mga residente sa isang lugar sa Juan Luna St., Tondo, Maynila nang dumating ang demolition team upang gibain ang 60 bahay na tahanan ng 100 pamilya, nakatirik sa 300 metro kuwadradong lupa na pag-aari umano ng Meridian Forwarders Inc., kaya’t sumiklab ang tensiyon sa naturang lugar.
Giit ng Presidente ng Tondo Central Neighborhood Association, Inc., mga residente sa nasabing lugar, naglabas ng kautusan ang City Legal Office na nagsasabing dapat iliban ang paggiba sa mga bahay dahil hinihintay pa ang desisyon ng Supreme Court , bagay na iginiit ng mga residente.
Napanatili ng mga tauhan ni Manila Police District (MPD) Director P/BGen. Andre P. Dizon, binubuo ng MPD DMFB, MPD Station 7, at Manila Traffic, ang kapayapaan at walang nasaktan sa magkabilang panig.
Nabigyan ng ilang minutong pagkakataon ang mga residente na lumikas at saka naituloy ang demolisyon dahil walang naipakitang temporary restraining order (TRO) mula sa Korte Suprema ang mga naninirahan sa lugar.
Nagtungo rin sa nasabing lugar ang mga kawani ng Department of Social Welfare and Development (DSWD) at Housing and Urban Development na umalalay sa mga residente. (BRIAN BILASANO)