HATAW! D'yaryo ng Bayan hatawtabloid.com
IPINAGDIWANG ng Iglesia ni Cristo (INC) ang ika-61 kaarawan ni Executive Minister Eduardo V. Manalo ngayong Linggo sa paglulunsad ng tema na “Ikinararangal ko na ako ay Iglesia Ni Cristo” para sa taong 2017 na magbubuklod sa milyon-milyon na kapanalig sa panawagan na naglalayong iangat sa kabatiran ng mundo ang paglagong nakamit ng Iglesia mula nang ito ay maitatag sa Sta. Ana, sa Maynila.
Ayon sa General Auditor ng INC na si Bro. Glicerio B. Santos Jr., ang kalulunsad na tema ay kumakatawan sa mga programa ng agresibong pagpapalawak, at naglalayong magsilbing inspirasyon sa mga kaanib nito na lalo pang paigtingin ang pamamahayag at pag-abot sa mga nangangailangang hindi kabilang sa INC.
“Sa ilalim ng pangangasiwa ni Ka Eduardo Manalo, nasaksihan ng INC ang ganitong malawakang paglago mula nang manungkulan bilang Tagapangasiwang Pangkalahatan noong 2009. Sa loob lamang ng nakalipas na limang taon, napasinayaan at naihandog natin ang 1,642 kapilya, na ang 74 ay nasa ibayong dagat. Nasa lahat na kontinente na ng mundo ang Iglesia,” masayang ibinunyag ni Santos.
“Patuloy na dumarami ang yumayakap sa pananampalataya at sa Iglesia, na hindi na mapigilan ang paglago mula nang itatag sa pamamagitan ni Ka Felix Manalo noong 1914. Kami ay naniniwala na naisakatuparan ito dahil sa Kanyang gabay, sa pangunguna ni Ka Eduardo, at sa halimbawa ng bawat kapatid at komunidad ng Iglesia – at ito ay dapat na ikarangal ng bawat isang kapatid sa INC,” ayon kay Zabala.
Ang INC ay may mga kongregasyon sa buong mundo. Matatagpuan ang mga kongregasyong ito sa 130 bansa at teritoryo sa 6 na kontinente.
Mula nang maitatag noong 1914 ng kauna-unahang Tagapangasiwang Pangkalahatan na si Felix Y. Manalo, ang INC ang isa sa pinakamalaki at pinakamabilis na lumagong pananampalataya sa bansa at sa buong mundo.
“Upang matingnan ang paglago ng Iglesia sa angkop na pananaw, alalahanin natin na ang Iglesia ay lumalago pa lamang ang bilang sa Filipinas noong isilang si Ka Eduardo.”
“Sa buong administrasyon ng kapatid na Eduardo V. Manalo, ang bilang ng mga umanib sa Iglesia ay lumago nang hindi pangkaraniwan. Ito ang dapat na ikarangal ng lahat ng nasa Iglesia dahil lahat ng kapatid, sa kanilang sariling pagpupunyagi at kaparaanan, ay kabahagi sa walang kapantay na paglago,” dagdag ni Santos. ( JSY )
