Game fowl breeder, tokayo ng senador tinodas ng rider

PATAY ang isang game fowl breeder at kanyang kamag-anak na si Joel Villanueva, hindi ang senador, matapos pagbabarilin ng isang impostor na delivery rider sa Barangay Alion, Mariveles, Bataan nitong Martes ng gabi.

Kinilala ang mga napaslang na sina Dane Calimbas, 44 anyos, may-ari ng farm ng mga manok na panabong, at kamag-anak nitong si Joel Villanueva, 47 anyos.

Sa report ng Bataan Police, nangyari ang insidente sa Brgy. Alion ng bayang ito dakong 6:00 ng gabi.

Base sa imbestigasyon, kapwa nasa bisinidad ng nasabing lugar ang dalawang biktima nang biglang dumating ang isang lalaking nagpanggap na online delivery rider para makapasok sa nasabing farm.

Ngunit pagkapasok ng suspek sa loob ay agad na bumunot ng baril at pinagbabaril si Calimbas na pinuruhan sa ulo habang si Villanueva na nakaupo naman sa tabi nito ay pinagbabaril din ng salarin, kapwa dead on-the-spot ang mga biktima.

Mabilis na tumakas ang suspek matapos masigurong napuruhan ang mga target.