Traffic enforcer niratrat sa palengke (Nanakit ng binatilyo)

PATAY ang isang traffic enforcer makaraan resbakan ng pamilya ng binatilyong sinaktan niya sa harap ng Sampol Market sa Sapang Palay, City of San Jose del Monte, Bulacan kahapon.

Sa ulat mula kay Supt. Renier Valones, hepe ng SJDM City PNP, ang biktima ay kinilalang si Luis Benita, hindi na umabot nang buhay sa pagamutan.

Habang naaresto ang isang miyembro ng pamilya ng mga suspek na bumaril sa biktima, na si Agnes Sulanya.

Habang pinaghahanap ang iba pang mga kaanak na sina Antonio Sulanya, Arvin Sulanya at isa pang hindi nakuha ang pangalan.

Napag-alaman, habang nakatayo ang biktima sa tabi ng kanyang motorsiklo at nagmamando ng trapiko nasagi siya ng isang binatilyo.

Sinasabing nagkainitan ang dalawa na nauwi sa pananakit ng biktima sa binatilyo. Pagkaraan ay agad umuwi ang binatilyo at nagsumbong sa mga kaanak.

Pulutong na sinugod ng mga Sulanya ang traffic enforcer sa pangunguna ni Agnes at kinompronta sa ginawang pananakit sa binatilyo.

Humantong ito sa sapakan ng biktima at ni Antonio at nakisali si Arvin saka walang sabi-sabing binaril ng kalibre .38 baril ang traffic enforcer.

Makaraan ang pamamaril, tumakas ang mga Sulanya ngunit sa follow-up operation ay nasakote si Agnes.