16 patay sa dengue sa Bulacan

UMABOT na sa 16 katao ang namatay sa sakit na dengue sa lalawigan ng Bulacan nang isang batang lalaki ang nadagdag sa listahan ng mga biktima bunsod ng sakit na dengue sa lalawigang ito.

Sa ulat mula sa Epidemiology and Surveillance Unit ng Bulacan Health Office, kinilala ang huling namatay na si Chloeyjade Banquin, 2-anyos, ng Sta. Rita, Guiguinto, sa naturang lalawigan, habang nilalapatan ng lunas sa Bulacan Medical Center.

Nabatid na ang kabuuang kaso ng dengue sa lalawigan ay umakyat sa 6, 939 hanggang Oktubre 25, at ang bilang na ito ay mas mataas ng 335 porsiyento sa 1, 631 kaso na naitala sa kaparehong panahon noong nakaraang taon.

Naitala ang pinamaraming bilang ng kaso ng dengue sa San Jose del Monte sa 1, 066; sinundan ng San Rafael, 530; Sta. Maria, 507; Malolos, 457; Hagonoy, 428; Bustos, 413; San Miguel, 394; Baliuag; 369; Plaridel, 297; San Ildefonso; 275; Guiguinto, 250; Bocaue, 253; Marialo, 221; Bulakan, 215; Calumpit, 212; Pandi, 211; Balagtas, 186; Meycauayan, 154; Angat, 124; Pulilan, 98; Paombong, 93, Norzagaray, 83; Obando, 74; at Donya Remedios Trinidad, 29.

Kasalukuyang nagsasagawa ang lokal na pamahalaan ng Bulacan ng “all-out-war” laban sa dengue sa pamamagitan ng malawakang paglilinis at pagsira sa mga lugar na pinamumugaran ng mga lamok.

Ayon kay Provincial health officer Jocelyn Gomez, ang operasyon ng nasabing paglilinis ay susundan ng pag-i-spray at patuloy na pagbibigay ng impormasyon sa mamamayan kung paano mapoprotektahan sa dengue.