Peace nego sa CPP-NPA-NDF lalarga na

UMAASA ang Malacañang na uusad na ang usapang pangkapayaan ng pamahalaan at ng kilusang komunista sa paghaharap nina House Speaker Feliciano Belmonte, CPP founding chairman Jose Ma. Sison at NDF chief Luis Jalandoni sa The Netherlands.

“Sana po mula roon sa inisyal na pakikipag-usap ni Speaker Belmonte sa mga lider ng CPP-NPA-NDF sa The Netherlands ay magkaroon po ng progreso hinggil sa muling pagbubukas ng dialogo o usapan sa pagitan ng dalawang panig,” ani Communications Secretary Herminio Coloma Jr.

Si Belmonte ay isa sa mga opisyal ng pamahalaan na dumalo sa pagdinig sa UN arbitral tribunal sa petisyon ng Filipinas kontra pangangamkam ng China sa West Philippine Sea (WPS) sa The Hague, The Netherlands.

Ayon kay Coloma, ang pagbubukas muli ng peace process sa mga komunistang grupo ay depende pa rin  sa ugnayan ng Office of the Presidential Adviser on the Peace Process (OPAPP) at sa pagkakasunduang patakaran sa peace talks ng dalawang panig.

Nauna nang nagpasalamat ang Palasyo sa pagsuporta ni Sison sa legal battle ng Filipinas laban sa China sa isyu ng maritime dispute sa WPS sa United Nations arbitral tribunal sa The Hague, The Netherlands.

Sina Sison at Jalandoni ay halos tatlong dekada nang nakabase sa The Netherlands ngunit tumatayo pa rin mga leader ng CPP-NPA-NDF peace panel.

Rose Novenario