SIM card-swap scam sinisilip ng NTC

MASUSING iniimbestigahan ng National Telecommunications Commission (NTC) ang sinasabing subscriber identity module (SIM) card swap scam sa isang customer ng Globe Telecom Inc.

Sinabi ni NTC Director Edgardo Cabarios, tutukuyin ng ahensiya kung may kapabayaan sa panig ng kompanya kaya nabiktima ang kustomer nitong si Ian Caballero.

Isang scammer ang humiling ng replacement SIM para kay Caballero nang hindi niya nalalaman. Inabisuhan ng Globe si Caballero ukol sa SIM-swap at agad nai-block ang bagong numero makaraan niya itong iulat. 

Gayonman, bago pa ito ay na-access na ng scammer ang lahat ng accounts ng biktima, kasama na ang kanyang online banking account na naka-sync sa orihinal niyang number. 

Sakaling pinahintulutan ng bangko and fund transfer, aabot sana sa P48,000 ang nawala sa account ni Caballero. 

Kaugnay nito, hihimukin din ng NTC ang mga telecommunication company na higpitan pa ang patakaran sa pagpapalit ng SIM card upang hindi na maulit ang insidente.

“Kung mahuli ‘yung gumawa n’yan, malalaman kung nagkaroon ba ng laxity (ang Globe) sa kaso na ‘yan. Kung mapatunayan po na naging maluwag sila, mayroon po silang liability,” ani Cabarios.