Killer ng tiyahin, nanakal ng lolo, isinuko ng ina (Biktima inilunod sa isang baldeng tubig)

ISINUKO ng kanyang ina kamakalawa ng gabi sa mga awtoridad ang suspek sa pagpatay sa kanyang tiyahin at nanakal sa kanyang lolo kamakailan sa Caloocan City.

Ang suspek na nakapiit sa detention cell ng Caloocan City Police ay kinilalang si RX Cabrera, 30, residente ng Kalawit St., Mayon, Quezon City.

Base sa impormasyon mula kay Supt. Bartolome Bustamante, hepe ng Caloocan City Police, dakong 8:30 p.m. nang sumuko ang suspek sa mga awtoridad sa Robinsons San Fernando, Pampanga.

Matatandaan, pinatay ng suspek ang kanyang tiyahin na si Monica Cabrera-Capacete, 57, naninirahan sa Block 24, Lot 13, Kingstown 2 Subdivision, Brgy. 171, Bagumbong, Caloocan City sa pamamagitan ng pagsakal bago inilublob ang ulo ng biktima sa isang balde ng tubig.

Habang nagpapagaling pa sa pagamutan ang lolo ng suspek na si Teodorico Cabrera, 86, naninirahan din sa naturang lugar, nahihirapan pa rin huminga dahil sa pagkakasakal sa kanya ni RX.

Sa ulat ng Station Investigation Division (SID) ng Caloocan City Police, naganap ang insidente dakong 1:20 p.m. noong Hunyo 30 sa loob ng bahay ng mga biktima nang hindi bigyan ng tiyahin ng pera ang suspek.

Rommel Sales