Ampatuan Sr., tinaningan ng doktor (Liver cancer nasa advance stage na)

POSIBLENG ilang buwan na lamang ang natitira para mabuhay ang multiple murder suspect na si Andal Ampatuan Sr. makaraan ma-diagnose na may liver cancer.

Base sa medical certificate na isinumite ng kanyang abogadong si Salvador Panelo sa Quezon City Regional Trial Court Branch 221, nasa advanced stage na ang liver cancer ni Ampatuan Sr.

Ang life expectancy daw para sa nasabing sakit ay tatlo hanggang anim na buwan na lamang, depende ito kapag patuloy na lumala ang liver function, na mas iiksi ang kanyang buhay.

“This is to verify that Andal Ampatuan Sr., is still admitted at our institute. He is currently being managed as a case of advanced liver cancer with signs of decompensation. Prognosis is currently dim as pharmacologist intervention is limited. Expected life expectancy for such case is three to six months but may be shorter if the liver function will continuously and progressively deteriorate,” base sa medical certificate.

Gayonman, ayon kay Judge Jocelyn Solis-Reyes kahit napirmahan ng doktor ni Ampatuan na si Jade Jamias ang medical certificate ay hindi ito na-notarize.

Maalalang kasama ni Ampatuan ang kanyang mga anak at maraming iba pa na nahaharap sa kasong multiple murder kaugnay sa Maguindanao massacre.

Aabot sa 58 ang namatay kabilang ang 32 media practitioners noong Nobyembre 23, 2009 dahil sa nasabing insidente.