Estudyante tigok, 1 pa kritikal sa amok  na BJMP officer

LEGAZPI CITY – Binawi-an ng buhay ang isang 16-anyos estudyante makaraan barilin ng nag-amok na opisyal ng Bureau of Jail Management and Penology (BJMP) sa Pio Duran, Albay.

Kinilala ang biktimang si Leo Ostunal, mula sa Brgy. 1 sa nasabing bayan, papasok na sana sa kanyang vocational course sa TESDA.

Tama sa ulo ang naging dahilan nang agarang pagkamatay ni Ostunal na noo’y nakatayo lamang sa pier kasama ang kanyang mga kaibigan nang biglang mag-amok ang suspek.

Habang kritikal sa ospital ang kaibigan niyang si Lyndon Cañaveral.

Napag-alaman, uminom muna ang suspek na si JO2 Renato Samaulan, 43, bago nag-amok at walang habas na nagpaputok ng baril sa mataong lugar.

Ayon kay Senior Insp. Jonnel Averilla, chief of police ng Pio Duran Municipal Police Office, base sa kanilang inisyal na imbestigasyon, may dinadalang personal na problema ang suspek bago pa ang insidente.

Nang malasing, unang nag-amok ang suspek malapit sa pier at pinaalis ang tricycle drivers at maging ang mga kabataang nakatambay.

Makalipas ang ilang sandali, nagbunot ng baril ang suspek at pinagbabaril ang mga kabataang nakatayo malapit sa pier.

Pagkaraan ay sumuko si Samaulan sa kanilang alkalde at ngayon ay nahaharap sa kasong murder at frustrated murder.

Sinabi ni Averilla, hirap pa ang kanilang mga imbestigador na makausap ang suspek dahil tulala pa rin at ayaw magsalita.