2 tauhan ni binay nasa PH pa (Ayon sa BI database)

HINDI pa nakalalabas ng bansa ang dalawang tauhan ni Vice President Jejomar Binay na iniuugnay din sa sinasabing katiwalian sa konstruksyon ng Makati City Hall Building II.

Ito ay kung pagbabatayan ang lumabas sa database ng Bureau of Immigration.

Ayon kay Justice Secretary Leila De Lima, agad niyang ipinabusisi sa Bureau of Immigration ang database ng kawanihan nang iulat ni Senador Antonio Trillanes na wala na sa Filipinas sina Gerry Limlingan at Eduviges Baloloy at sila ngayon ay pinaghahanap na ng International Police.

Ipinaliwanag ni De Lima, batay sa database ng BI, si Gerardo Simpao Limlingan Jr., may birthdate na Abril 11, 1942 ay huling umalis ng Filipinas noon pang Oktubre 11, 2003 at nakabalik sa bansa noong Oktubre 17, 2003.

Habang si Eduviges Duenas Baloloy, may birth date na Oktubre 17, 1950 ay huling umalis ng Filipinas noong Setyembre 2, 2014 at nakabalik noong Setyembre 6, 2014.

Gayonman, nilinaw ni De Lima na hindi nila isinasantabi ang posibilidad na dumaan ang dalawang tauhan ni Binay sa backdoor o ‘di kaya ay bumiyahe sa pamamagitan ng chartered plane o private plane.

Leonard Basilio