4 gun for hire members nasakote

APAT armadong kalalakihan na sinasabing mga miyembro ng isang grupo ng gun-for hire ang naaresto nang pinagsanib na puwersa ng pulis-Navotas at Caloocan police Special Weapons and Tactics (SWAT) nang mamataan sa magkasunod na araw sa iisang lugar habang inaabangan ang kanilang target sa Caloocan City kamakalawa ng hapon.

 Kinilala ni Senior Supt. Bartolome Bustamante, hepe ng Caloocan Police, ang mga suspek na sina Chris Kristoffer Ramos, 21, Christopher Villazorda, 35, kapwa ng Navotas City; Freddie Garingo, 52, ng Obando, Bulacan at Samuel Bulado, 39, ng Brgy. Concepcion, Malabon City, pawang nahaharap sa kasong illegal possession of firearm and ammunitions at illegal possessions of explosive devices.

Ayon kay Caloocan police Station Investigation Division chie, C/Insp. Ilustre Mendoza, dakong 2:45 p.m. nang madakip ang mga suspek sa C-3 Road, Brgy. 21 ng lungsod.

Sa ulat nina PO2 Joy Alcoriza at PO2 Michael Olpindo, sakay sa isang van sina Navotas police Sr. Insp. Emmanuel Gomez at PO2 Gerry Maliban at binabagtas ang kahabaan ng C-3 Road nang mapansin nila ang mga suspek na sakay sa dalawang motorsiklo at nakabukol sa tagiliran ang mga sukbit na baril.

Agad silang nakipag-ugnayan sa Caloocan Police Assistance Center (PAC-8) na mabilis namang humingi ng tulong sa mga tauhan ng SWAT.