OMB chair Ronnie Ricketts, 4 pa kinasuhan ng graft

SINAMPAHAN ng Office of the Ombudsman ng kasong graft si Optical Media Board (OMB) Chairman Ronnie Ricketts at apat na iba pa bunsod ng sinasabing pagpahintulot nila na maibalik ang kompiskadong pirated DVDs at VCDs sa owner company nito noong 2010.

Sa reklamong inihain sa Sandiganbayan nitong Miyerkoles ng hapon ngunit ipinabatid lamang sa media nitong Huwebes, sinabi ng government prosecutors, si Ricketts, bilang OMB chairman at executive officer, ay nakipagsabwatan sa apat pang opisyal ng OMB Enforcement and Inspeciton Division (EID) “in giving unwarranted benefit, advantage or preference” sa private company na Sky High Marketing Corporation sa pamamagitan ng pagbabalik sa kompanya sa nakompiskang Digital Video Discs (DVDs) at Video Compact Discs (VCDs).

Ayon sa Ombudsman, sa imbestigasyon ng field officers, nabatid na noong umaga ng Mayo 27, 2010, kinompiska ng personnel ng OMB mula sa Sky High Marketing building sa Quezon City ang tone-toneladang piniratang DVDs at VCDs.

Ngunit dakong hapon, ang confiscated items ay ini-release at ibinalik sa sasakyan ng kompanya, ayon sa Ombudsman.

Bukod kay Rickets, kabilang din sa kinasuhan sina OMB executive director Cyrus Paul Valenzuela, EID head Manuel Mangubat, EID investigation agent Joseph Arnaldo, at EID computer operator Glenn Perez.