Airport police tigok sa zumba

ISANG airport police na nakatalaga sa Ninoy Aquino Aquino International Airport (NAIA) ang natumba at pinutukan ng ugat sa ulo matapos dumalo sa weekly physical fitness activity na Zumba sa kanilang headquarters sa Pasay City nitong nakaraang Martes.

Dalawang araw, matapos matumba at putukan ng ugat sa ulo, namatay sa ospital si airport police 2 Archimedez Rodriguez.

Sa panayam sa kanyang mga kasamahan, sinabi nilang hindi madalas dumalo sa kanilang weekly Zumba si Rodriguez, dahil masama lagi ang kanyang pakiramdam.

Lagi umanong sinasabi ni Rodriguez, “nahihilo ako, hindi ko kaya ang magsayaw nang magsayaw.”

Bukod sa laging nahihilo, ang 52-anyos na si Rodriguez, hindi rin umano siya mahilig magsayaw.

Ang hindi pagdalo ni Rodriguez sa Zumba ay nakatawag umano sa pansin ni Manila International Airport Authority (MIAA) Asst. General Manager for Security and emergency Services (AGM-SES) Jesus Gordon Descanzo.

Agad umanong pinadalhan ng memorandum ni Descanzo si Rodriguez dahil sa pagbabalewala sa weekly Zumba ng airport police.

Sa pangambang maireklamo o sampahan ng kaso, dumalo nitong Martes si Rodriguez sa kanilang Zumba dakong 5:00 ng hapon.

Natapos ni Rodriguez ang Zumba at nakauwi pa siya sa kanilang bahay, ngunit pagdating doon ay bigla siyang natumba.

Naitakbo sa ospital si Rodriguez pero pagkatapos ng dalawang araw, pumanaw ang biktima.

Wala pang kompirmasyon ang tanggapan ni Descanzo sa insidente ng pagkamatay ni Rodriguez.