Bagong kasal hinoldap ‘sa Honeymoon’ (P.1-M cash gift target)

LAOAG CITY – Sugatan ang bagong bride nang holdapin sa kanilang bahay ang bagong kasal sa kanilang pulot-gata sa Brgy. Palongpong sa lungsod ng Batac, kahapon ng madaling araw.

Ayon kay Supt. Reynaldo Ogay, hepe ng PNP Batac, mahimbing na natutulog ang bagong kasal na sina Rodel Soria, 27, at Aurora Soria, 41, parehong residente sa naturang lugar, nang bulabugin ng tatlong lalaking nasa tapat ng nakabukas na bintana ng kanilang kuwarto. Nang magising ang mag-asawa, nagdeklara ang mga suspek ng holdap sabay tutok ng baril.

Ikinatwiran ng lalaki na nasa kabilang kuwarto ang kanilang pera kasabay nang pagtatangka niyang patakasin ang asawa ngunit pinaputukan sila ng mga suspek kaya tinamaan ng bala ang puwet ng babae. Pagkaraan ay mabilis na tumakas ang mga suspek pero walang nakuha sa mag-asawa. Isinugod ang biktima sa Mariano Marcos Memorial Hospital and Medical Center sa Batac City.

Nabatid na ang mag-asawa ay kakakasal lamang kamakalawa at tinatayang umaabot sa P100,000 ang cash gift na naipon nila.