Girian vs China idinaan ng PH sa social media

DINALA ng administrasyong Aquino sa social media ang pakikipaggirian sa China kaugnay sa mga teritoryo sa West Philippine Sea.

Hinimok kahapon ni Communications Secretary Herminio Coloma Jr., ang publiko na panoorin at i-share ang video na pinamagatang “Kalayaan: Karapatan  sa  Karagatan”  upang lubos na maunawaan ang usapin hinggil sa West Philippine Sea.

Maaari aniyang matunghayan ito sa Facebook page ni Pangulong Benigno Aquino III Aquino na nakapaloob sa president.gov.ph.

Ipinaliliwanag sa nasabing video ang pinagmulan ng usapin at kung paano nakaaapekto ito sa kabuhayan ng mga Filipino at sa integridad ng karagatan at likas na yamang dagat ng ating bansa.

Ang unang bahagi ng tatlong yugtong dokumentaryo ay unang ipinalabas noong Araw ng Kalayaan, Hunyo 12, upang palaganapin ang kahalagahan na tayong mga Filipino ay dapat manindigan para sa ating karapatan sa karagatan. Ang dokumentaryong ito ay isinagawa sa pamamagitan ng koordinasyon ng Department of Foreign Affairs (DFA) at ng Presidential Communications Operations Office (PCOO). Rose Novenario