Ulo ng 6-anyos nabutas sa kagat ng nabanas na pit bull

LAOAG CITY – Inoobserbahan sa isang pribadong ospital sa San Nicolas, Ilocos Norte, ang isang 6-anyos totoy bunsod nang matinding sugat sa ulo makaraan pagkakagatin ng alagang pit bull kamakalawa.

Ayon kay Brgy. Chairman Emmanuel Ragingan ng Brgy. 13 sa nasabing bayan, nagpasaklolo sila sa mga pulis dahil hindi nila maawat ang pit bull sa pagkagat sa bata na nabutas ang likurang bahagi ng ulo.

Ani Ragingan, dahil sa awa ay hindi na natakot ang nag-aalaga sa paslit kaya sinagupa ang aso upang pigilin ang pagkagat sa biktima

Sinabi niya na kapwa nasa trabaho ang mga magulang ng biktima nang mangyari ang insidente kaya’t ang lolo ang humingi ng tulong.

Samantala, humihingi ang ama ng bata na si Anton Nicolas, empleyado ng Department of Environment and Natural Resources (DENR) sa Ilocos Norte, ng panalangin para sa agarang pag-rekober ng kanyang anak.

Sinabi niya na agad tinurukan ng anti-rabies ang bata nang madala sa ospital at kasalukuyang ligtas na sa peligro.

Naniniwala si Nicolas na nagwala ang alagang pit bull sa kanyang kulungan dahil sa epekto nang mainit na panahon hanggang makawala sa labis na pagkabanas.

HNT