4 residente inatake ng aswang sa Cotabato

PINANINIWALAANG inatake ng hinihinalang aswang ang apat residente ng Aleosan, Cotabato kabilang ang isang 4-anyos paslit nitong Lunes ng gabi.

Mula sa sentro ng kabayanan, kailangan pang bumiyahe ng 15 kilometro bago marating ang Sitio Upper Tapudok, Brgy. Tapudok kung saan sinasabing kinagat ang apat ng isang malaking itim na pusa na pinaniniwalaang aswang.

Ayon kay Datu Ali Alamada, 15-anyos, at isa sa mga nasugatan, nagkaroon muna ng masangsang na amoy bago nakita ang malaking itim na pusa. 

Habang sinabi ni Hamida Kunting, naramdaman na lang niyang malamig ang kanyang kamay at pagtingin niya’y marami nang dugo mula sa kagat ng sinasabing asawang. 

Kwento ng isa pang residente na si Pong Salilama, naigapos pa nila ang aswang ngunit nakawala rin.

Dahil sa insidente, naglagay na ng mga pangontra ang mga residente sa kani-kanilang bahay gaya ng bawang, gaas, kawayang matulis ang dulo at iba pa. 

Gabi-gabi na ring nagpapatrolya ang mga lalaking residente para mahuli ang sinasabing aswang.