Outing ng pamilya naging trahedya (Sasakyan swak sa bangin)

DAGUPAN CITY – Hindi inaasahan ng mag-anak na mauuwi sa trahedya ang masaya sana nilang outing nang mahulog sa bangin ang kanilang sasakyan sa isang resort sa San Fabian, Pangasinan kamakalawa.

Agad binawian ng buhay ang isang Anselmo Cayabyab, 48-anyos.

Habang sugatan ang kanyang mga kaanak na sina Erlinda Tucay, 65; Remidios Mosarbas, 67; Consorcia Bautista, 45; Alicia Fernandez, 31; Alver Fernandez, 3; Ken Tristan Mosarbas, 7; Judith Bautista, 43; Ana Doreen Bautista, 16; Rachelle Ramos, 29; Ervin Cayabyab, 15; Enrique Cayabyab; at Renato Prado, 36-anyos.

Ayon sa impormasyon, nasa loob na ng isang resort sa Brgy. Colisao sa nabanggit na bayan ang sasakyan ng mga biktima nang senyasan ng isa sa mga tauhan ng resort na magparada sa bakanteng basketball court ngunit nagkamali ng pagtantiya sa pagliko ang driver na si Prado dahilan upang mahulog sa bangin ang sasakyan.

Isinugod sa pagamutan ang mga biktima ngunit idineklarang dead on arrival si Cayabyab.

Nasa kustodiya na ng pulisya ang driver ng sasakyan.