3 sugatan, kabahayan nawasak sa baha

TATLONG babae ang nasugatan nang rumagasa ang baha dulot nang malakas na ulan na ikinasira ng kanilang mga bahay sanhi ng ginagawang road construction project kamakalawa ng hapon sa Brgy. Tunasan, Muntinlupa City.

Sa ulat ng pulisya ng Muntinlupa, ang mga nasugatan ay kinilalang sina Liezl Deguchi, 36; Conchita Santiago, 28; at Jemmalen Cachuela, nasa hustong gulang, pawang nakatira sa Aguila Village, Brgy. Tunasan, Muntinlupa.

Nabatid na sobra ang init ng panahon dakong 2 p.m. at ‘di inaasahan ang biglang pagbuhos nang malakas na ulan na epekto ng bagyong Dodong.

Nagdulot ito nang pagbaha dahil sa tubig na sinasabing galing sa malalim na hinukay para sa gagawing kalsada sa construction site ng MDC Corp., sa South Luzon Epressway (SLEX).

Dahil sa pag-overflow at sa pagragasa ng baha kasama ang natibag na lupa ay nawasak ang ilang kabahayan sa naturang village at nasugatan ang tatlong biktima.

Isinisi ng mga residente ang insidente sa kapabayaan ng namamahala sa konstruksiyon.

Samantala, agad ipinag-utos ni Mayor Jaime Fresnedi na masusing imbestigahan ang insidente upang mabatid kung may kapabayaan ang naturang construction firm.

Manny Alcala