2 karnaper timbog sa Oplan Lambat-Sibat

LAGUNA – Arestado sa isinagawang “Oplan Lambat Sibat” ng pinagsanib na elemento ng Sta. Rosa City PNP Laguna Highway Patrol Group (HPG) at Provincial Intelligence Branch (PIB) 1st District, ang dalawang itinuturong miyembro ng carnapping group sa bahagi ng National Hi-way, Brgy. Balibago, lungsod na ito kamakalawa ng gabi.

Batay sa isinumiteng report ni Supt. Reynaldo Maclang, hepe ng pulisya, kay Acting Laguna PNP Provincial Director, Senior Supt. Florendo Saligao, kinilala ang mga naaresto na sina Dennis Divina, at Eduardo Fernandez, residente ng lungsod ng Sta. Rosa.

Sa imbestigasyon ng pulisya, dakong 9:40 p.m. nang magsagawa ng surveillance operation sina Maclang; HPG chief, Chief  Insp. Arnel Pagulayan, at PIB team leader ng 1st district na si Insp. Cabanillas, at kanilang mga tauhan, sa SG-TEN Trading Repair Shop.

Ito ay kaugnay nang namataang alarmadong kinarnap na Toyota Vios (AAC-9672) na pag-aari ng biktimang si Michael Angelo Ocampo, 24, service adviser, ng lungsod ng Calamba, na kinarnap nitong nakaraang linggo.

Agad silang naglatag ng magkahiwalay na checkpoint sa lugar at mabilis na nadakip si Fernandez habang lulan sa minamaneho niyang kinarnap na kotseng Toyota Vios.

Si Divina na nagpakilalang opisyal ng PNP, ay nahuli habang minamaneho ang isang Honda City (AAY-9971).

Kapwa nakapiit na ang mga suspek sa Sta. Rosa City PNP Lock Up Cell at nakatakdang sampahan ng kaukulang kaso sa piskalya.

Boy Palatino