Wanted na bomb expert Basit Usman patay na

KINOMPIRMA kahapon ni AFP Western Mindanao Command (Wesmincom) chief, Lt. Gen. Rustico Guerrero, nabaril at napatay ng mga sundalo mula sa 6th Infantry Division ang most wanted na Filipino bomb expert na si Abdul Basit Usman sa may bahagi ng Guindolongan, Maguindanao.

Ayon kay General Guerrero, nasa proseso pa rin ang Wesmincom sa pagkalap ng mga detalye kaugnay sa pagkamatay ni Usman.

Nabatid sa ulat, nakasagupa ng mga sundalo ang grupo ni Usman bandang 11:30 a.m. kahapon.

Bukod kay Usman, patay rin ang dalawa niyang kasamahan.

Magugunitang nakatakas si Usman nang salakayin ng mga tropa ng PNP Special Action Force (SAF) ang kanilang kubo noong Enero 25 sa Mamasapano, Maguindanao ngunit si Marwan ay napatay ng SAF troopers.