Mindanao walang brownout sa laban ni Pacman — NEA

TINIYAK ng National Electrification Administration (NEA) na walang mararanasang brownout sa buong Mindanao sa laban ni Manny Pacquiao sa Linggo, Mayo 3.

Sinabi ni NEA Administrator Edith Bueno, dahil isang malaking event ang bakbakang Pacquiao-Floyd Mayweather Jr. ay pinaghandaan na ito ng mga electric cooperative.

Bukod dito, panigurado aniyang may generator sa mga gym at iba pang lugar kung saan magkakaroon ng libreng livestreaming ang mga lokal na opisyal.

“Nothing to worry kasi taga-Mindanao rin si Congressman Pacquiao so the more people will really want to see him,” dagdag ng NEA chief.

Una nang naiulat ang araw-araw na rotating brownout sa ilang bahagi ng Mindanao dahil sa kakulangan ng suplay ng koryente ng mga kooperatibang Zamsureco 1, Zamsureco 2, Zamcelco, Cotelco, Sukelco, Aselco at Surseco 1.

Habang siniguro ng Department of Energy (DoE) na hindi magkaka-brownout sa Luzon at Visayas sa Linggo.