2 Pinoy mountaineer ligtas sa lindol sa Nepal  

LIGTAS ang dalawang mountaineer na Filipino na inabutan ng Magnitude 7.8 lindol na tumama sa Nepal habang nasa base camp ng Mount Everest.

Ito ang kinompirma ng Department of Foreign Affairs (DFA) batay sa ulat na kanilang natanggap mula sa Embahada ng Filipinas sa New Delhi, India.

Magpapadala pa rin ang DFA ng team sa Nepal para ayudahan ang mountaineers na sina Jessica Anne Nicole Ramirez at Jose Francisco Oracion.

Ang dalawa ay nagtungo sa base camp ng Everest para sa isang bakasyon at nanatili sa Khwopa Guest House sa Bhaktapur, Kathmandu nang maganap ang pagyanig.

Kasalukuyang nasa Durbar Square ang dalawa na dinala ang mga nakaligtas mula sa lindol na nagdulot din ng avalanche sa naturang bundok.

Binanggit ng DFA, posibleng dalhin sina Ramirez at Francisco sa konsulada sa New Delhi, pinakamalapit sa kanila o ‘di kaya ay ikuha ng ticket pabalik ng Filipinas.

Kasabay nito, tiniyak ni Maria Agnes Cervantes, Chargé D’affaires ng embassy sa New Delhi, na walang nadamay na Filipino sa lindol sa Nepal.