MILF hinamon ni Sen. Chiz (Sa Mamasapano case)

HINAMON ni Senador Francis Escudero ang MILF na harapin ang mga isasampa sa kanilang kaso kaugnay sa insidente sa Mamasapano, Maguindanao.

Ginawa ni Escudero ang hamon kasunod ng pahayag ng MILF na walang kasalanan ang kanilang mga tauhan sa pagkamatay ng SAF 44 dahil ‘self defense’ ang kanilang ginawa at bilang rebelbeng grupo ay hindi nila kinikilala ang batas ng estado.

Desmayado si Escudero dahil kung ang lahat ay ikakatwiran na hindi sila naniniwala sa mga batas ng bansa ay wala nang maaaring kasuhan.

Binigyang-diin ni Escudero, hindi maaaring ikatwiran ng MILF na bilang revolutionary group ay may ‘immunity’ sila ‘from suit’ dahil applicable lamang ang ‘immunity’ kung pirmado na ang kanilang kasunduan sa gobyerno.

Nilinaw rin ni Edcudero na alinsunod sa batas, ang mga maaari lamang gumamit ng mga alyas ay nasa sining at kultura ngunit hindi kasama ang mga rebeldeng grupo.

Pinagsabihan din ni Escudero ang government peace panel at Office of the Presidential Adviser on The Peace Process na bawasan ang kanilang yabang at pagiging agresibo sa pagsagot sa mga tanong sa panukalang Bangsamoro Basic Law (BBL).

Cynthia Martin