31st Balikatan Exercises sinimula na

PORMAL nang sinimulan ang sampung araw na Balikatan Exercises o ang taunang pagsasanay militar ng tropang Filipino at Amerikano, ayon sa Palasyo.

Inihayag kahapon ni Communications Secretary Herminio Coloma Jr., ito ang ika-31 edisyon ng Balikatan mula nang simulang isagawa noong 1951 alinsunod sa Mutual Defense Treaty ng Filipinas at Estados Unidos.

Layunin aniya nito na makamit ang katiwasayan at katatagan ng seguridad, at ang kahandaang tumugon sa ano mang krisis o kalamidad na nagdudulot ng panganib at ligalig sa publiko.

Ang 31st Balikatan Exercises ay isinasagawa sa gitna nang puspusang reclamation activities ng China sa Panganiban Reef na itinuturing ng Filipinas na teritoryo ng bansa.

“Kung nagkataon na sa kasalukuyan ay mayroong mga partikular na usapin o hamon, ito ay ginagampanan pa rin bilang bahagi ng layunin na maging mataas ang kahandaan ng dalawang bansa at ganap ‘yung paghahanda para makatugon sa ano mang umiiral na hamon,” sabi ni Coloma.

Isa rin aniya sa mahalagang aspeto ng Balikatan ang kahandaan sa paglulunsad ng agarang pagtugon sa mga krisis bunsod ng mga kalamidad.

Rose Novenario