2 konteserang bading todas sa ambush

KORONADAL CITY – Dalawang bading ang namatay makaraan pagbabarilin sa bahagi ng Purok Upper Liberty, Bo. 5, Banga, nitong Linggo ng madaling araw.

Agad binawian ng buhay ang dalawang biktima na sina Wency Estorninos, lending collector, residente ng Prk. Iti, Brgy. Rizal Pob., Banga; at Jenor Deretcho, beautician, at residente ng Prk. 3, Brgy. Zone 4, Surallah.

Habang nakaligtas ang isa pang bading na kinilalang si Eugene Caballero, beautician, at residente sa Brgy. Cabuling, Banga.

Inihayag ni PO1 Laila Vencer ng Banga PNP, galing sa isang beauty pageant ang tatlong bading at habang sakay ng isang motorsiklo sa bahagi ng Upper Liberty sa bayan ng Banga, hinarang sila ng dalawang hindi nakilalang suspek sakay ng kani-kanilang motorsiklo at may dalang kalibre .45 baril.

Tinangkang tumakbo ni Estorninos ngunit agad siyang binaril ng isang suspek sa likod ng ulo.

Si Deretcho ay binistay ng bala sa dibdib at tiyan.

Ang kasama nilang si Caballero ay nakatakbo palayo sa isang palayan at nagtago sa katabing irrigation canal kaya hindi nakita ng mga suspek kaya masuwerteng nakaligtas.

Iniimbestigasyon ng pulisya ang insidente.