PNOY mag-iikot sa Semana Santa (Seguridad titiyakin)

PERSONAL na mag-iinspeksiyon si Pangulong Benigno “Noynoy” Aquino IIII sa ilang lugar para tiyakin ang seguridad ng publiko ngayong Semana Santa.

Ayon kay Presidential Spokesperson Edwin Lacierda, palagi itong ginagawa ng Pangulo mula nang simulan ang kanyang administrasyon.

“The President always does that from the time we started his administration, ang ating Pangulo po ay talagang dumadalaw, iniinspeksyon po itong ating mga terminals, mga shipping port, mga airport just to make sure that safety is the number one factor,” ani Lacierda.

Sa nakalipas na mga taon, kabilang sa mga binibisita ang ilang pangunahing pier, paliparan at terminal ng bus para tiyakin ang inilatag na seguridad ng mga ahensya ng pamahalaan para sa mga biyahero ngayong Semana Santa.

Gayonman, wala pang maibigay na detalye si Lacierda kaugnay ng pag-iikot ni Aquino.

May paalala rin ang Palasyo sa publiko ngayong panahon ng Semana Santa na panahon ng pagninilay-nilay.

“May we encourage our motorists to exhibit safety as they drive. We also would like to remind common carriers of their responsibility to exercise the ordinary diligence in conveying our Filipino passengers to and from their point of destinations.”

Sa Miyerkoles inaasahang daragsa sa mga pantalan, pier at paliparan ang mga biyahero lalo’t sa Huwebes na ang simula ng bakasyon ng maraming empleyado.