TRO vs Binay suspension ipinatitigil sa SC ng Ombudsman

HUMIRIT ang Office of the Ombudsman sa Korte Suprema na ipawalang-bisa ang inisyung temporary restraining order (TRO) ng Court of Appeals (CA) laban sa suspension order kay Makati Mayor Junjun Binay.

Marso 11 nang magpalabas ang Ombudsman ng anim-buwan preventive suspension kay Binay at sa iba pang opisyal ng lungsod na sinundan ng panunumpa ni acting Mayor Romulo Peña. 

Ngunit makaraan ang ilang oras, nagpalabas ng 60-araw na TRO  ang CA, bagay na kinuwestiyon ng kabilang kampo.

Miyerkoles ng hapon, naghain na ang anti-graft court ng petition for certiorari and prohibition na humihirit ng TRO at writ of preliminary injunction para pigilan ang CA sa pagpapatupad ng inisyu nitong TRO.

Paninindigan ng Ombudsman, may awtoridad sila bilang isang independent constitutional body sa pag-iisyu ng suspension order sa opisyal ng gobyerno.

Sinalag din ni  Ombudsman Conchita Carpio Morales ang bantang contempt sa pagsasabing ilegal at improper ito dahil isa siyang impeachable officer.

Kaugnay nito, dapat din aniyang itigil ang mga proceeding kaugnay ng apela sa CA ng kampo ni Binay.

Leonard Basilio