3 drug pusher tiklo sa shabu at baril

CAMP OLIVAS, Pampanga – Nasakote ng mga elemento ng Anti-illegal Drug Force ng San Fernando Police, sa pakikipagtulungan ng Philippine Drug Enforcement Agency-3 (PDEA-3) ang isang lalaki at dalawang babaeng hinihinalang notoryus na drug pusher sa buy-bust operation sa Brgy. Quebiawan, City of San Fernando.

Sa ulat ni Supt. Rechie Duldulao, hepe ng San Fernando Police, sa tanggapan ni Senior Supt. Rodolfo Recomono Jr., Pampanga Police Provincial Director, hindi nakapalag ang ang mga suspek na sina Augusto Rivera alyas Balbas; Loreta Ligtag, alyas Let, 35; at Amy Manlapaz, 34, pawang ng Meranda Compound, Brgy. Quebiawan, nang damputin ng mga pulis habang iniaabot sa poseur buyer ang dalawang large size plastic sachet na naglalaman ng shabu kapalit ang P2,000 marked money sa buy-bust operation sa nasabing barangay.     

Bukod sa shabu ay nakompiskahan din ang mga suspek ng isang .45 kalibre ng baril na may apat na bala, at isang motorsiklo.

Leony Arevalo