PH ex-Ambassador sa Nigeria guilty sa malversation

HINATULANG guilty ng Sandiganbayan si dating Philippine Ambassador to Nigeria Masaranga Umpa para sa tatlong counts ng kasong malversation of public funds.

Ito’y kaugnay ng maanomalyang paggamit ng dating opisyal sa US$ 80,478.80 o P3,749,948.98 na Assistance to Nationals stand-by funds.

Ayon sa desisyon ng Sandiganbayan, 10 hanggang 17 taon makukulong si Umpa kaakibat ang habambuhay na diskwalipikasyon sa pagbabalik-gobyerno.

Ipinasasauli rin sa kanya ang winaldas na pondo.

Ayon sa Ombudsman, Pebrero 2007 nang makatanggap ang embahada ng Filipinas sa Nigeria ng US$ 95,856.08 para sa negosasyon at pagpapauwi ng 25 seafarers na kinidnap sa Port Harcourt at Warri Delta State, Nigeria. 

Noong 2008, ipina-audit ng Department of Foreign Affairs (DFA) ang pondo at natuklasang gumamit ng pekeng dokumento si Umpa para sa liquidation.

Nagsilbing ambassador sa Nigeria si Umpa mula 1996 hanggang 2008.