Sanggol namatay sa meningococcemia (Sa CamSur)

BINAWIAN ng buhay ang isang 11-buwan sanggol dahil sa sakit na meningococcemia sa Fernando, Camarines Sur, ayon sa report na natanggap ng Department of Health (DoH).

Ayon sa DoH, noong Marso 17 namatay ang sanggol at dahil positibo sa sintomas ng meningococcemia ang biktima ay agad inilibing at binigyan ng prophylaxis ang mga naging close contact.

Samantala, iimbestigahan ng Philippine Integrated Disease Surveillance ng Bicol ang nasabing insidente.

Sa natanggap na ulat ng DoH, bago nadala sa ospital ang sanggol ay mayroon na siyang rashes sa ulo at katawan, nilalagnat, hirap sa paghinga, nangingitim at balisa kaya huli na ang pagbibigay sa kanya ng lunas at agad binawian ng buhay.

Samantala, pinayuhan ni Gloria Balboa, regional director for DoH Bicol, ang mga residente ng rehiyon na maging alerto sa mga sintomas ng meningo na maaaring tamaan kahit sino.

Kabilang aniya sa mga sintomas ay lagnat, ubo, sore throat, at rashes na parang mapa ang itsura, karaniwang nagsisimula sa hita at braso, maaari rin na magsuka at makaranas ng stiff neck.

Leonard Basilio